ألوان كتيرة ملخبطة
ورق و كله شخبطة
لوحة ملامحها مشلفطة
لا باينة رسمة و لا شوية شخبطة !!
بالتة ألوان كبيرة
ألوانها ساحت عملت ألوان كتيرة
و الأصل تاه وسط الدنيا المريرة
و ساب دنيا آخر لخبطة !!
شخبطت حبه و الناس دي شاهدة
خطين تلاتة حسبوها وردة
ده قال جميلة و ده زهرة شاردة
و دي لسة مجرد شخبطة !!
عامل مفتح و في الأصل نايم
فنان حقيقي و لا أنت واهم
و الناس بتفتي و لا حد فاهم
و ناس في الخط مبلطة !!
بالفرشاة برسم و بلون كمان
حواليا لحن مش باين ناي من كمان
نسكت كفاية و لا نقول كمان
ده حتي الكلام ملوش معني و آخر لخبطة !!
دنيا عجيبة ...
جدور طينتها مليانة طيبة
سقوها سقية .. شقت ثمارها طلعت غريبة
يعني صباح اللخبطة !!
دنيا كبيرة معيّلة
حرة و بردو مسلسلة
عيشتها حلوة منيّلة
شابت و لسة مقطقطة !!
دنيا حلاوتها مشطشطة
لوحة ملامحها مشلفطة
لا باينة دنيا و لا شوية شخبطة
دي دنيا اخر لخبطة !!!
Esraa Hamed
1/2/2008