حلم البنـــات
حلم البنات ..
عصفور في عشه ..
عش الحمام ..
حب و هيام ..
فستان و كوشة ..
و حصان و فارس و تبات نبات ..
و عيال و دوشة و مفيش سكات ..
و تبقي حياتنا سكر نبات ..
شموسة جاية تنوّر حياتنا ..
قمراية تحلّي في الليل سهرنا ..
و عصفور صغيّر مليان شقاوة ..
دي عيال تجنن آخر حلاوة ..
في الفجر نصحي علي صوت آدان ..
نقوم نصلي و نسبّح كمان ..
نحضّر فطورنا .. و نستحضر هدفنا ..
بيت جميل ..
أسرة جميلة صغنتوتة ..
رسالتها حلوة و كتكوتة ..
و بلدنا تعلي .. و معاها نعلي ..
و نشوفها دايما مبسوطة ..
و يوم الأجازة ..
يومنا دايما آخر لذاذة ..
نخرج نسافر ..
ننسي تعبنا ..
و نزور صحابنا ..
نلعب و نسهر .. مهو يوم أجازة ..
و نبدأ تاني و من جديد ..
أسبوع جديد حلو و سعيد ..
و ندعي يارب يفضل بيتنا دايما سعيد ..
و نفضل دايما تبات نبات ..
و نعيش حياتنا سكر نبات ..
و هو ده حلم البنات ..
14/2/2008
38 comments:
كميلة انتي بجد
كل سنة وانتي طيبة اولاً
عجباني اول حتة قوي
يعني هوه حلم بس من وسط الاحلام
برغم ان انا حاساه محدود قوي مش عارفة لية
برغم انك ذكرتي التربية الصح الي هتطلع نشء صح في جملة و بلدنا تعلى ومعاها نعلي
حلمك او حلمنا عسول كتكوت صغنتت بس برضو حاسة فية حاجة ناقصة
طيب بعيداً عن الفكرة اللي هيا عجباني
و اسلوب عرضها الخفيف قوي العسول دة
علي مسامعي
الوزن في لغة الشعراء
بس انا لست بشاعرة
المهم يعني
علي مسامعي
نقوم نصلي , نسبح كمان احلي من نقوم نصلي و ن سبح
حاسة الواو هنا تقيلة عليا
او يمكن لما انتي بتقوليها بتبقي سهلة
في نفس الكوبلية برضو
نستحضر هدفنا تقيلة برضو عليا
حاسة الجملة
يا رب يفضل دايماً بيتنا سعيد
طويلة حبتين
ممكن ول يكي الحرية عجبتك او لأ يعني براحتك
يا رب دايما ... بيتنا يفضل .. عايش سعيد
يعني تقسميها مقاطع
دة من رأيي وطبعاً انتي ادري
انا فاشلة في المواضيع دية
مجملاً البتاعة عسولة
بس برضو حاسة بنقص في الحلم
دية مشكلة فيا انا بقة
سلام عليكم
نعم
قد يكون هذا هو حلم البنات
و الذي بدى ورديا جدا من خلال تدوينتك الرائعة
لكن للأسف
احيانا يتدخل الحب ليفسد كل شىء
فتجد البنت نفسها تحب شخص ما لن يوفر لها كل هذه الاحلام
رغم بساطتها
و يبقى السؤال وقتها
هل البيت و الاستقرار و الهدوء و المودة المتبادلة و الاولاد
سيعوضون الفتاة عن الحب المفقود ؟
عارفة ليه التدوينة دى حلوه
لانها حلم وبس
مش اكتر من حلم
كل سنة وانتى طيبة
وده حلم الجميع على فكرة صبيان وبنات كبار وصغار
مش حلم البنات بس
حلم كل انسان عايز يعيش بجد
ربنا يحققلنا الحلم ده يارب على خير
وحشنا وجودك :)
جميلة اوى يا سوسو
دايما بنحلم احلام كتيرة ولد بنت ما بتفرقش بس كلنا بنحلم وجايز الاحلام تتحقق وجايز ما تتحققش وجايز تتحقق باسلوب غير اللى حلمنا بيه بس فى الاخر اجمل مما فى الحلم انك تحلمى الحلم بجد علشان لما يتحقق تحسى بقيمة انك حلمتيه جايز كلامى مش مفهوم بس عامة احلى ما فى الحياة ان تحلم دائما
اولا اشتقتلك جدا يا اجمل اسراء
مبروك البوست الجديد او الحلم الجديد
حلم
حلو اوى اوى يا اسراء كله نعومه وطيبه وروح طيبه
حلم بنوته بريئه ما طلعت على الدنيا اللى بره
بس اكيد حلم لينا كلنا
وبتمنى ربى يحققلك كل احلامك
بس المره دى بجد اسرتينى فى سطورك
قريت البوست بقلبى مش بعيونى وعقلى
كتير يجنن
لانه من قلبك واكيد هيوصل لقلوب قرائك
عموما كل عام وانتى ديما اجمل واحلى اسراء
وبردوا انتى وحشتينى
روح
خفيفة وجميلة اوى بجد
عارفة انا فعلا حسيت وانا بقراها انة اجمل حلم
حلم ام حلم اب حلم ولد بنت كلنا بنحلم بكل الى قتليلة
تسلم ايدك على الكليمات الجميلة
الرقيقة حسيت بجد انك ماشية فى مكان كلة زهور وفرحانة اوى وبتتنطتى اوى
ربنا يسعد ايامك كلها يارب
كل الحب يااسراء
رندا
احلامهم جميله
بس فين البنات دول فى كوكب ايه؟؟؟؟؟
اصل البنات عندنا فى الارض ليهم احلام تانيه خاااالص
ربنا يهدى كل البنات يخلى احلامهم كلها جميله ومعقوله منطقيه
ومتجيش وحده تقولى حلم حياتى اعمل فيديو كليب مثير
او اطلع فى فيلم زى اوقات فراغ مثلا
او اغانى وتكون مثلها الاعلى روبى ولا مروى ولا هيفا
البوست رائع
واسلوبك جميل اوى
تحياتى
كلامها بناتي فعلاً ..خفيفة ورقيقة
بس كان في كلمات تقيله شوية ومبوظه الوزن زي نستحضر
كل سنة وإنتي طيبة
احلام رااااائعه وجميله كلنا نحلم بها دوما ونحلم ان نعيشها عل ارض الواقع
اسلوبك جميل اوى
ربنا يحقق ليكى كل اللى بتتمنيه
لكى منى كل التحيه
ما اجمل احلامكن
وما اجمل تعبيراتك عن احلام البنات
الرقيقة الجميلة المفعمة بالأمل والحب والحياة والايمان
تحيتي
دة حلم البنات البريئات .
الي لسة ماعداش عليهم نصابين
ولا كذابين
و لا حد داس على قلوبهم قبل كدة :)
حلم جميل أوي
كان عندي زيه
بس انا بطلت أحلم
من زمااااااان
:)
و راضية كدة
باللي بيحصل و خلاص :)
الكلام جميل يا إسراء أوي ..
ربنا يديم عليكي مشاعرك البريئة دي
و يحفظك يا حبيبتي.
كل سنة وانتى طيبة ويارب العيدد الجاى تكونى حققتى احلامك بس دة بجد حلمى وحلم اى شاب سواء كان بنت او ولد
بجد كلمات جميله اوي ...
وهي احلام رقيقه بريئه متهيالي كل انسان يتمني ان يكون له بيت واسره جميله سيحلم مثلها
تحياتي
السلام عليكم
ازيك يا اسراء
حلم البنات .... بجد حلم رقيق وهادي ورومانسي
بس يارب يتخطي كونه حلم ويكون حقيقه لكل البنات
تحياتي ليكي
السلام عليكم
حلمك جميل يا اسراء و كلامك اجمل
ياارب يحقق كل احلامك و كل احلام البنات البريئه الحلوه
بجد حلوه قوى و رقيقه جدا
تقديرى و تحياتى
السلام عليكم
حلمك جميل يا اسراء و كلامك اجمل
ياارب يحقق كل احلامك و كل احلام البنات البريئه الحلوه
بجد حلوه قوى و رقيقه جدا
تقديرى و تحياتى
رائعة بحق .. رائعة ودون جدال :)
لقد رايت تلك الفتاة التى لم تبلغ بعد العاشرة بتلك الضفيرتين تهرول فى ارض خضراء تحلم بمستقبل لا تنطوى صفحاته حاملة الاسى
كلماتك حالمة رقيقة .. فيها احلام انثى تحاول القفز لحكم عرشها فى ممكله من صنعها
لك منى كل احترام وتقدير جميلتى :)
من بعيد اوى ... بكتبلك
جميلتي نعكوشة
و انتي طيبة يا قمرة
بجد نورتيني و مبسوطة جدااااااااااا بتعليقك
كلمة نستحضر في نستحضر هدفنا بردو زي ما قلتي عملتلي مشكلة عشان كنت مش لاقية كلمة تانية تدي نفس المعني خالص
و كانت مضايقاني كمان عشان كنت حساها فصحي في وسط العامية بس مش لاقية غيرها و كنت محتاجهة معناها
و لما نزلتها كنت نفسي حد يلاقيلي كلمة بدلها و تدي نفس المعني
بس مش لاقي بقي اعمل ايه
فكري و قوليلي و انا اغيرها علطول
نورتيني يا قمر
و مستنياكي دايما
:))
Jack Sparrow
او رلج المطر زي ما عرفت مؤخرا
اسعدني مرورك و تعليقك جداااا و اجابة علي سؤالك ان كل ماذكرت في حلقة واحده لا يمكن تقسيمه البيت و الاستقرار و الهدوء و المودة المتبادلة و الاولاد كل هذة الاشياء لا تغني عن الحب و لا هو يغني عنهم
يارب تكون الخاطرة عجبتك
تحياتي
lonely
ليه بس حلم بس مهو كل الحقائق اللي عايشنها دلوقتي كانت حلم في يوم من الايام و اتحكم بردو عليها انها مستحيلة
عايزة اقولك ان الحياة مبتقفش عند موقف او تجربة
اي حاجة في الدنيا لو كانت خير كان ربنا كملهالنا
عشان كده متقوليش انها مجرد حلم
مستنية ردك يا قمر
و مبسوطة جدااااااا بمتابعتك
اه صح انتي ليه قفلتي مدونتك
بقالي فترة مش عارفة اجي ازورك
ينفع كده يعني و لا ايه !!
الجميلة موناليزا
نورتيني يا قمر
و سعيدة جداااااا بمتابعتك
الرقيقة حمامة
نورتيني يا قمرة
و سعيدة بوجودك معايا
اوشا الجميلة
نورتيني يا اوشتي
و كلامك مفهوم طبعا
عايزة اقولك ان حاجة مهما كانت حلوة لما بتحصل من غير منكون حلمناها مبنحسش بحلاوتها
عشان كده اجمل حاجة في الدنيا الاحلام
منورناني يا قمرة
و مبسوطة بوجودك معايا اويييييييييييييي
مستنية يوميات كرسي جديد ;)
الجميلة روح
بجد انتي راااااااائعة انا بحب اي حاجة بتكتبيها و كل حاجة بتقوليها حتي تعليقاتك بحس فيها برقة مش عند من الناس التانين
ربنا يخليكي ليه يا قمر و افضل دايما عند حسن ظنك
رندا
نورتيني يا قمرة و اسعدتني جدااااا كلماتك الرقيقة
مستنياة تعليقاتك دايما
:)
الاخ الفاضل ممكن
مبتهيأليش يعني في بنات كل حلمهم انهم يعملوا فيديو كليب و هدفهم الاعلي روبي و هيفاء
و لو في ده ميمنعش بردو ان في ناس ليها احلام تانية خالص
أسعدني مرور حضرتك جدااااا
تحياتي
Hu-man
شرفني مرور و تعليق حضرتك جداااا
اما عن كلمة نستحضر انا رديت علي نعكشة في نفس النقطة
تحياتي
جميلتي عاشقة الاستقرار
انتي اللي ما اروعك يا دودي يا قمرة
بجد مبسوطة جدااااااا انك متابعاني و مبسوطة اكتر لاني عرفت انك انتي كمان بتكتبي
مستنياكي دايما
:))
اخي الفاضل جني
اشكرك بشدة علي مرورك و اطرائك
جزاكم الله كل خير
قهوتي المفضلة
شيماء الجميلة
بداية نورتيني جداااااا و سعيدة جداااا بمتابعتك
مين بقي قالك اني معداش عليا و لا نصابين و لا كدابين
عادي يعني الكدابين دول موجودين في كل حتة و صعب تلاقي حد ما اتحطش في مشكلة من النوع ده او متصدمش في حد كان بيثق فيه اوي في يوم من الايام
بس الحياة مبتقفش عند تجربة
و احلامنا هي بتلون حياتنا
لو محلمناش و رضينا نفضل علي اطلال تجارب قديمة يبقي عمرنا ما هنعرف نعيش بعد كده
كمان لازم نبقي مقتنعين ان اي حاجة في الدنيا طالما ربنا اللي اختارهلنا اكيد هي افضل اختيار لينا
ممكن بس منبقاش احنا شايفين ده دلوقتي
عشان كده لازم الحياة متقفش و لازم نفضل نحلم بس عشان نقدر نعيش
منوراني كعادتك طبعااا
و نفسي اشوف ردك
تسلميلي يا قمرة
Geo Amr
أسعدني تواجد حضرتك جدااااااا
و كل سنة و حضرتك بخير
الفارس الملثم
اسعدني تواجد حضرتك و تعليقك الجميل
جزاكم الله خيرااا
برقش
اسعدني مرور حضرتك و تعليقك
جزاكم الله خيراااا
الرقيقة روفي
نورتيني يا قمرةو مبسوطة بكلامك اويييييي
البحث عن أنا شىء جنونى
بداية انا سعيدة جدااااااا بزيارة حضرتك الاولي لمدونتي
و يارب متكونش الاخيرة
و بجد بشكرك علي الزيارة لانها عرفتني بمدونتك الرائعة
و اسمحلي اكون من قراءك
جزاكم الله خيرااااا
Post a Comment