قال علي رأي المثل ...

البوست المرادي مختلف شوية عن كل الحاجات اللي كتبتها قبل كده
يمكن اسلوبي فيه متأثر بشكل كبير بصديقتي الجميلة ايمان صاحبة اوشاويات

***

البوست ده السبب فيه هو مشروع التخرج
فلازم اديكوا فكرة الاول عن المشروع قبل ما نبدأ
بما أني بردو في قسم التصميم الداخلي او ديكور يعني زي ما الناس بيسموه في الكلية المدعوة بفنون تطبيقية
فمشروع التخرج بتاعي هو عبارة عن قرية سياحية
المفروض اعمل التصميم الداخلي و تصميم الاثاث الخاص بكل المناطق بها

و من أجزاء القرية دي بقا
المطعم المتخصص
و اللي حاليا بعمل الديزاين بتاعه

و انا قررت ان اخلي المطعم ده بيقدم أكلات بيتيه
و قلت هخلي الطراز بتاعه مستوحي من الفلكلور المصري القديم


و وانا بدور علي داتا عن الفلكلور ده طلع في دماغي ادور علي امثال
امثال من بتاعة زمان دي اللي بتيجي في الافلام
معرفش يعني ايه علاقتها في الموضوع
بس الموضوع عشش في دماغي جدااااااااا و قلت لااااااازم ادور عليهم
اهو الواحد بردو يعرف الناس بتوع زمان دول كانوا بيفكروا ازاي
و كمان مهو في ناس لحد دلوقتي لسة بتقول الامثال دي و مقتنعة بيها



انا جبتلكوا شوية حاجات لفتت نظري قوي
تيجو نحلل مع بعض الامثال دي
يعني كل حد يقوللي انا شايف المثل ده صح اوي او شايفه غلط اوي
و يقوللي ليه
و نتناقش حبه في الكلام ده

يمكن نطلع بحاجة

يااااا مسهل
:
:
:


:
:

هسيبكوا مع الأمثااااااااال
و قال علي رأي المثل
............



علي وشك يبان يا مداغ اللبان

خذ الأصيلة واقعد على الحصيرة

الدنيا زي الغازية , ترقص لكل واحد شوية

اللي ما تعرفش ترقص تقول الارض عوجة

العشق بعد الستين زي المش في الطين

الله يخلي أختي وأخويا أشم فيهم ريحة أبويا

العضة محبة من عجوز أو شبه

يا محلى الجمعه لو على فانوس وشمعة

اسمها قمر وأبوها شهاب وشكلها زي الهباب

شوف القرد وأتامل عينيه ما تلاقي غير السواد حواليه

زرت اللي ما يحبوني حطوني في المقعد ونسيوني

أتلاقت المكنسة مع البلاعة وصاروا جماعة

أنا زي الساعة يوم أتكتك ويوم أهاتي ويوم أروح للمصلحاتي

زمان منكوس يرفع الرجول ويخفض الرؤوس

تيتي تيتي زي ما رحتي زي ما جيتي

أموت في محبوبي لو كان عبد نوبي

سوده يا قهوه والقلب وما يهوى

قلبي زي الدكان لكل واحد فيه مكان

كل شيء بالسيف إلا ألمحبه بالكيف

حابس لابس على قلبك كابس

الدنيا مصالح يبو صالح

أجري يا مشكاح للي قاعد مرتاح

العين عليها حارس

الي يعمل ظهره قنطره يستحمل الدوس

اللي متحتاجش النهارده وشه بكره يحوجك الزمن لقفاه

امك البصل و ابوك الثوم هتجيب الريحه الحلوه منين يا مظلوم

اللى مربى قرد عارف لعبه

إن خرج الفقر من بابه بدل فوله بكبابه

العين صابتني و رب العرش نجاني

حجا اولى بلحم توره

إللى يعمل نفسه ردة تبعتره الكتاكيت

ياواخد القرد على مالو راح المال وضل القرد على حالو

إجري يا إبن آدم جري الوحوش غير رزقك لم تحوش

إدفي القدرة على فمها تطلع البنت على أمها

الطول طول نخلة و العقل عقل صخلة

لو كان فيه الخير مكنش رماه الطير

و أخيراااااااا

من جاور السعيد يسعد

مستنية تعليقاتكوااااا

:)))))

ألوااااااااااااان

تحديث

عايزة اهني اتنين من اجمل البنوتات بمناسبة انضماهم لعالم التدوين

رضوي عمرو صاحبة لوغاريتمات
و اللي هتسعدوا جدااا بالغوص في طيات كلماتها الفلسفية المتأملة

و هتضحكوا من قلبكوا و انتوا بتقروا في اوشاويات
لـ ايمان مجدي باسلوبها المتميز
و اللي بجد بتوقعلها تبقي حد من اشهر كتّاب الادب الساخر في مصر
***************

ألوااااااااااااان

الأحمر

فيض متوهج
عالم من الحياة
الحب .. الجنون .. الحياة
..

البرتقالي

انطلاقة الصيف ..
ابتسامة القدر ..
سمو الروح و تحليق الحياة ..

الأصفر

الغوص في فلسفاتٍ سيريالية ..
البحث عن أسرار الحياة ..
الشمس .. مرآة الحياة ..

الأخضر

انتعـــــــاش ..
عالم آخر من الجمال ..
أرجوحة خيالية عالقة علي نسمات من الحياة
..

الأزرق

شجن ممزوج ببعض الأمنيات الحزينة ..
ليل حتما سيليه صباح ..
قمر فضي لامع في سماء حالمة ..

القرمزي

رقة ممتزجة ببعض جنون
..

الأسود

رائحة الأمطار الثلجية
غموض خُطّ بسريالية ..
الوجه الآخر للحياة
..

الأبيض

عالم ناصع حالم ممزوج بروح تلك الطفلة البرئية ..
مساحة فارغة للتدوين ..
قلم معلق بين أسطر الحياة ..
قلب مستعد للتلوّن
..



إسراء حامد
15/3/2008

شكر مخصوووووص

بعد حفلة التوقيع انهارده
بجد عايزة اشكر كل حد كان موجود

و اتشرفت بلقائه انهارده

هخص بالشكر

الكاتبة الجميلة و الرااائعة
غادة محمد
صاحبة كتابها الرااائع بجد
"أما هذة فرقصتي أنا"
اللي شرفتني انهارده و معاها تميم القمر الصغنتت بتاعنا

غادة بجد حد جميل و طيب اويييييييييييييييي و انا بجد اتشرفت جداااا بمعرفتها و بحضورها توقيع كتابي

****

عايزة اشكر كمان
الكاتب و المدون الرائع
صاحب المسحوق و الارض الصلبة
ا/ابراهيم عادل

هو اللي كان بيدير اللقاء
و بجد سعدت جدااا بتواجده

****

الكاتب المميز
ا/حسام مصطفي ابراهيم
صاحب كتاب يوميات مدرس في الارياف


****

كاتبتي المفضلة الجميلة
شيماء سمير
أطياف الصمت

****

و طبعا القصاص و الروائي العظيم
محمد الغزالي
صاحب ساديزم

شرفني حضورك جدااا بجد

****

و ناثر البخور
(طارق عميره)

****

و الكاتب
مصطفي ريان
صاحب اعترافات رئيس سابق

****

شكر كمان جداااا للجميلة مريم صاحبة مدونة نــعــكــشــة
نورتيني يا مريومة جداااااااا


و ايمان مجدي صاحبة مدونة اوشاويات
و اللي بجد بتوقعلها تبقي حد من اشهر كتاب الادب الساخر في مصر


رضوي
صديقتي الجميلة
وصاحبة لوغاريتمات

*****

كل المدونين الي كانوا دايما بتابعوني بجد حتي اللي مقدروش يجوا عايزة اشكركوا اوي

روح شرقية - سنووايـــــــت - روح وريحان - صدى الصمت - wa7di
برقش - ممكن - جنّي - أمير الدموع - ا/عمرو الجندي
غراب و حمامة - ايناس حليم - قهوة بالفانيليا


بجد اتعلمت منكوا كتيييييييير
و مهما هقول شكرااا مش هتوفيكوا حقكوا

*****


صحابي بجد اللي كل يوم بتزيد غلاوتهم عندي
و كل يوم بيثبتوا بجد انهم فعلا اخوات مش مجرد اصدقاء
كل الحضور بجد
فرحتوني جدااااااااا


جزاكم الله خيراااا كثيرااا

هستني رأيكوا في الكتاب ان شاء الله
منتظرة تعليقاتكوا

:)

قلب أخضر ...

قلب أخضر

أقفز علي أرجوحتي الصغيرة ..

يطيح بها الهواء يمنةً و يسارا ..

أشعر شعور طفلة حرمت اللعب لأعوام كثيرة ..

مازلت أحمل ذلك القلب الصغير ..

أو ربما ذلك العقل الصغير ..

أرجوحة و بستان و ضفائر صغيرة ..

مقلمة حمراء جديدة ..

و حقيبة خُطّ عليها بعض طلاسم تسعدني و لا أفهمها ..

حذاء أسود ..

و بالطبع لن أنسي أن يكون الشراب أبيض له دانتيل ..

ما أجمل تلك الأحلام القديمة ..

بلا خوف .. بلا شك .. بلا يأس ..

كم أتوّق لمثل تلك الأحلام ثانية ..

كم أتوّق لمثل تلك الأيـــام ثانية ..

ضحكة صافيـة ..
قلب أخضـــــر ..
عمر أبيـــــض ..

أريد درسا من طفل صغير ..

كيف ينفصل كليا عن ذلك العالم فيحيا في هذه الدنيا عمر أبيض ..

فلنبحث عن بقايا الطفل بداخلنا ..

و لننعم بذلك القلب الأخضر ..

Esraa Hamed
17/10/2008

من كتاب أحيانا و أحيانا
******************


متنسوش حفل توقيع أحيانا و أحيانا ان شاء الله
يوم الاربعاء 11 مارس 2009
الساعة 7 مساءا
بمكتبة البلد أدام الجامعة الامريكية
العمارة اللي فيها سيلانترو

في انتظاركوا جميعا
:)

عدت سنة ...

تحديث تاني

أحيانا و أحيانا في مجلة بحلقة

http://b7l2a.net/adab/442.html

كل الشكر للأستاذ أحمد عرفة رئيس التحرير
و د/محمد زهران مسئول قسم أدب ألوان
:)
***************
تحديث

حفل توقيع
كتاب "أحيانا و أحيانا"


يوم الأربعاء 11/3/2009
السابعة مساءا
بمكتبة البلد
أمام الجامعة الامريكية
و بجوار سيلانترو كافيه

ننتظركم
:)


http://www.facebook.com/event.php?eid=133120355079


*********************************


عدّت سنة

سنة رسمت جوانا حاجات كتير
و خدت منا بردو حاجات كتير

سنة عشناها بكل ما تحمله الكلمة
و زي ما عودتنا دايما كل السنين
أحيانا .. و أحيانا

أحيانا نتمني انها تفضل معانا
و أحيانا نتمني انها تعدي بسرعة يمكن اللي بعديها تكون احلي

عدت سنة اكتشفت خلالها اني يمكن بعرف اكتب نوعا ما
و سبحان الله بعد ما كنت بحس ان الناس اللي بتكتب دي عالم تاني و دماغ عالية

21 فبراير 2008
فتحت المدونة
يعني كنت بعتبرها نوعا ما مغامرة مكنتش مستنية منها نتيجة بالسرعة دي

24 يناير 2009
كان يوم خروج أول كتاب ليه للنور

الحاجة اللي مكنتش اتوقع ابدا انها تحصل في يوم من الايام

!!!!!!


شكرااااااااااااااااااا
لكل اللي كانوا دايما بيشجعوني


شكرااااااااااااااااااا
لكل اللي نقدني مرة عشان اكيد اتعلمت كتير من النقد ده


شكرااااااااااااااااااا
لك اللي حط تعليق رسم علي وشي بسمة

شكرااااااااااااااااااا
لكل اللي مر حتي من غير ما يعلق لأن يمكن دول اللي بيخلوني دايما احاول اكون احسن عشان المرة الجاية يعجبهم البوست و اشوف تعليقهم

:)


أجمل ناس في الدنيا عرفتها من عالم التدوين
و احلي اوقات كنت بقضيها و انا بقرأ التعليقات بتاعتكوا
و أكتر وقت كنت بحس اني بعمل حاجة بحبها و انا بتابع الحاجات الجديدة اللي بتكبوها و اللي كتير جدااا أثرت فيا و في اسلوب كتابتي


جزاكم الله خيراااااااااااااااااااااااااااا


**********
و دعواتكوا كتييير لمامتي بالشفاء

لحظات اشتياق ...

لحظات اشتياق ..

لحظات اشتياق ..

ومضات من عذابات ضمير ..

نزاعات و هتافات ..

نبش بجرح قديم قارب علي الالتئام ..

قصاصات من عذابات علي وشك النسيان ..

في عالم زجاجي ..

نصر أن نخفي ما بحوذتنا ..

في عالم يصر أن يعيش علي أوتار حياته الماضية ..

نتظاهر بالبحث في اعماق الحداثة ..

بين شروق و غروب ..

بين ليل و صباح ..

بين شمس و قمر ..

بين موت و حياة ..

تتوه خطانا و ننجذب للخلف اميال ..

فقط بفعل ..

لحظات اشتياق ..

Esraa Hamed

11/1/2009

صدمــــــــة

انا بجد اتصدمت
يعني مش مستوعبة ان الموت ممكن يكون حوالينا اوي للدرجادي و مش واخدين بالنا منه

بجد مش مصدقة لحد دلوقتي و مستنية حد يبعت يقول ان ده كان مقلب
انا بجد مصدومة و خايفة و حسة بحاجة غريبة
يمكن عمري ما قابلته قبل كده بس علي الاقل كنت بقرأ كلامه و بيعلق علي كلامي
مش عارفة اقول ايه بجد و مش قادرة اتكلم دلوقتي

بس بجد بالله عليكوا تدعوا كتيييييييير للفارس الملثم بالرحمة
http://raingrazy.blogspot.com/

رحمك الله و اسكنك فسيح جناته