يمكن اسلوبي فيه متأثر بشكل كبير بصديقتي الجميلة ايمان صاحبة اوشاويات
***
البوست ده السبب فيه هو مشروع التخرج
فلازم اديكوا فكرة الاول عن المشروع قبل ما نبدأ
بما أني بردو في قسم التصميم الداخلي او ديكور يعني زي ما الناس بيسموه في الكلية المدعوة بفنون تطبيقية
فمشروع التخرج بتاعي هو عبارة عن قرية سياحية
المفروض اعمل التصميم الداخلي و تصميم الاثاث الخاص بكل المناطق بها
و من أجزاء القرية دي بقا
المطعم المتخصص
و اللي حاليا بعمل الديزاين بتاعه
و انا قررت ان اخلي المطعم ده بيقدم أكلات بيتيه
و قلت هخلي الطراز بتاعه مستوحي من الفلكلور المصري القديم
و وانا بدور علي داتا عن الفلكلور ده طلع في دماغي ادور علي امثال
امثال من بتاعة زمان دي اللي بتيجي في الافلام
معرفش يعني ايه علاقتها في الموضوع
بس الموضوع عشش في دماغي جدااااااااا و قلت لااااااازم ادور عليهم
اهو الواحد بردو يعرف الناس بتوع زمان دول كانوا بيفكروا ازاي
و كمان مهو في ناس لحد دلوقتي لسة بتقول الامثال دي و مقتنعة بيها
انا جبتلكوا شوية حاجات لفتت نظري قوي
تيجو نحلل مع بعض الامثال دي
يعني كل حد يقوللي انا شايف المثل ده صح اوي او شايفه غلط اوي
و يقوللي ليه
و نتناقش حبه في الكلام ده
يمكن نطلع بحاجة
يااااا مسهل
:
:
:
:
:
هسيبكوا مع الأمثااااااااال
و قال علي رأي المثل
............
علي وشك يبان يا مداغ اللبان
خذ الأصيلة واقعد على الحصيرة
الدنيا زي الغازية , ترقص لكل واحد شوية
اللي ما تعرفش ترقص تقول الارض عوجة
العشق بعد الستين زي المش في الطين
الله يخلي أختي وأخويا أشم فيهم ريحة أبويا
العضة محبة من عجوز أو شبه
يا محلى الجمعه لو على فانوس وشمعة
اسمها قمر وأبوها شهاب وشكلها زي الهباب
شوف القرد وأتامل عينيه ما تلاقي غير السواد حواليه
زرت اللي ما يحبوني حطوني في المقعد ونسيوني
أتلاقت المكنسة مع البلاعة وصاروا جماعة
أنا زي الساعة يوم أتكتك ويوم أهاتي ويوم أروح للمصلحاتي
زمان منكوس يرفع الرجول ويخفض الرؤوس
تيتي تيتي زي ما رحتي زي ما جيتي
أموت في محبوبي لو كان عبد نوبي
سوده يا قهوه والقلب وما يهوى
قلبي زي الدكان لكل واحد فيه مكان
كل شيء بالسيف إلا ألمحبه بالكيف
حابس لابس على قلبك كابس
الدنيا مصالح يبو صالح
أجري يا مشكاح للي قاعد مرتاح
الي يعمل ظهره قنطره يستحمل الدوس
اللي متحتاجش النهارده وشه بكره يحوجك الزمن لقفاه
امك البصل و ابوك الثوم هتجيب الريحه الحلوه منين يا مظلوم
اللى مربى قرد عارف لعبه
إن خرج الفقر من بابه بدل فوله بكبابه
العين صابتني و رب العرش نجاني
حجا اولى بلحم توره
إللى يعمل نفسه ردة تبعتره الكتاكيت
ياواخد القرد على مالو راح المال وضل القرد على حالو
إجري يا إبن آدم جري الوحوش غير رزقك لم تحوش
إدفي القدرة على فمها تطلع البنت على أمها
الطول طول نخلة و العقل عقل صخلة
لو كان فيه الخير مكنش رماه الطير
و أخيراااااااا
مستنية تعليقاتكوااااا
:)))))
34 comments:
تحفة جدااااااااااااااااااااااااااا
يااسراء
انا اساسا باموت فى اى حاجة فولكلور
ادينى بقا من الحاجات دى
انا مش هاشرح حاجة
كلهم واضحين وباينين
اللى يعوز يستفسر بما انى فلكولورية جدااااااااااا ممكن اتواضع واشرحلكم
نسيت
جنه
اول مرة تيجي تزوريني في مدونتي
نورتيني يا جنة جدااااااا
:))
الطول طول نخلة و العقل عقل صخلة
دى اللى سيادتك بتقوليهالى وانا بقول جبتيها منين اتارى المشروع ضيع الجزء اللى كان باقى سليم فى عقلك
وعليه العوض ومنه العوض
بس عجبنى كام حاجة
إللى يعمل نفسه ردة تبعتره الكتاكيت
العين صابتني و رب العرش نجاني
بشوفها علطول على الميكروباصات وعربيات النص نقل
امك البصل و ابوك الثوم هتجيب الريحه الحلوه منين يا مظلوم
اسمها قمر وأبوها شهاب وشكلها زي الهباب
وبتقولى سيادتك متاثرة بيا طب ده خير نفعتك فى حاجة اهو ....انا هضيعلكم الجزء اللى باقى يا قسم اثاث
الف شكر يا ايسو على الامثال الجامدة دى وعلى راى المثل
اللي متحتاجش النهارده وشه بكره يحوجك الزمن لقفاه
:P
هههههههههههههههههههه
خطيره فعلا الامثال القديمه دى بتخلينا
نضحك فى الاول بس بعد ما نفكر فيها
بنلاقيها فعلا حكم و بنتعلم منها كتير
اوشاااا
:D:D:D
نورتي يا قمرايا
و علي فكرة الامثال اللي اخترتيها هي اكتر حاجة عجباني انا كمان بردو
انا عجبني بتاع الكتاكيت ده جداااااا
معني مش فاهماه يعني
يمكن عشان بحب الكتاتيت
:D
ثانكس يا اوشا يا أصيلة
و قال على راى المثل
خذ الأصيلة واقعد على الحصيرة
:P
صيدلانية
منوراني يا جميل
عندك حق فعلا الامثال بتخلينا نضحك في الاول و بعدين نعد نفكر في معناها و نطلع الحكم اللي تقصدها
:))
السلام عليكم
خدي عندك
كل قرد يلزم شجرته
زمن شكالب مقالب الأرنب من قصر ديله
ماشي مع التغالب
حبيبي عليا تغطرش وعيونه تكب المدامع أعمي ينادي علي أطرش لا ده شايف ولا ده سامع
شكرا للفكرة
لو أحتجتي أي أمثال في أي لحظة بس قولي حضرتك
السلام عليكم
ا/احمد الصعيدي
شكرا لمرورك الجميل
و تعليقك
:))
عجبني ده اوي
زمن شكالب مقالب الأرنب من قصر ديله
ماشي مع التغالب
:)
اللي متحتاجش النهارده وشه بكره يحوجك الزمن لقفاه
امك البصل و ابوك الثوم هتجيب الريحه الحلوه منين يا مظلوم
اللى مربى قرد عارف لعبه
إن خرج الفقر من بابه بدل فوله بكبابه
العين صابتني و رب العرش نجاني
حجا اولى بلحم توره
إللى يعمل نفسه ردة تبعتره الكتاكيت
أمثله بتتكرر كتير في مجتمعنا ولا بد نهتم بيها
مشكور على موضوعك
وتقبلي زيارتي
سلام عليكم .. فيه كتاب لأحمد باشا تيمور اسمه الأمثال الشعبية فظيع مليان حاجات زي دي بس أنا هعلق على آخر مثلين نظرا لأني قصير فأنا مؤمن إن الطول طول نخلة والعقل عقل صخلة مع إني مش عارف الصخلة دي بس شكلها حاجة وحشة ، كمان بما إن اسمي أحمد سعيد فمن جاور السعيد يسعد @ تحيتي وشكرا لهذه الأمثال الجميلة @
يااللي بيتكم من جالوس والسقف مرفوع من سباتة ..لما جريت في أيديكم الفلوس نسيتوا مخلاية الشحاتة
السلام عليكم
حبيت بس أعدي أسلم وأسيب مثل علي الماشي
روعه يا اسراء بوست هايل هايل بس قوليلى جيبتى كل الامثله العجيبه دى منين؟؟؟؟
لكن الحقيقه بوست دمه سكر
تحياتى
الشاعر محمد عبد الرحمن
اسعدني مرور حضرتك و تعليقك
:)
الدرعمي
زيارة حضرتك و تعليقك اسعداني كثيرا
شكرا لك
و في انتظارك دوما
:)
نظرة
شكرا لحضرتك و ان شاء الله تبقي مدونة جميلة و نشارك كلنا فيها
شكرا لحضرتك مرة تاني
ا/احمد
جميل المثل ده
:))
عجبني اوييييييييييي
يااللي بيتكم من جالوس والسقف مرفوع من سباتة ..لما جريت في أيديكم الفلوس نسيتوا مخلاية الشحاتة
ممكن
مبسوطة كتير ان البوست عجبك
:))
الامثال مالية النت
بس كنت عايزة رأي حضرتك فيهم
ايه اللي عجبك و ايه اللي معجبكش و اهم حاجة لييييييه
:)
ما أقساه من قلب.. ذلك الذي يحكم على صاحبه بالبقاء في صراعات العقل المسلوب
ما أقساه من عقل.. ذلك الذي يقف عن التفكير.. تاركا صاحبه يموج في عذابات القلب المسلوب
كلامك حلو اوي، الف مبروك على الكتاب وإلى الأمام دائما ان شاء الله
اتمنى اكون صديق للمدونة الجميلة دي
اسف ان التعليق مش في مكانه وعلى رأي المثل
من جاور السعيد يسعد
ماتديش وشك للدبان وتقول قضا الرحمن
السلام عليكم أختي سارة
اسلام
ميرسي جداااااااا لمرورك و تعليقك الجميل
و الله يبارك فيك
يارب يكون الكتاب عجبك
:)
هو بعض الأمثال دي للأسف الشديد فيها أفكار خاطئة ..وبالتأكيد تدل بشكل كبير على ازاي الناس كانت بتفكر ساعتها ...بس انتي جبتي الحاجات دي منين
موهوبة انتي يا اسراء،
الكتاب عجبني جدا في حتت حبتها اوي وفي حاجات ممكن اقول عليها ملاحظات :P او انا اصلا مش فاهمها :)
بالنسبة للمثل دا
إللى يعمل نفسه ردة تبعتره الكتاكيت
فانا حاسس انه فيه شبه كبير من المثل دا
اللي يسيب الناس تقول عليه حمار، يروح يشتريله بردعه
:D
جميلة مجموعة اامثال دى
وفى منها حقيقى ونتاج تجربه
دمتى بود ياقمر
تحياتى
جميلة مجموعة اامثال دى
وفى منها حقيقى ونتاج تجربه
دمتى بود ياقمر
تحياتى
شجر الليمون
و عليك السلام و رحمة الله
:)
Human
الامثال طبعا في منها الخاطئ و منها الصحيح
كنت عايزة اعرف رأي حضرتك في الحاجات دي بقا
جبتهم من ع النت لو عملت سيرش هتلاقي العجب
:)))
تحياتي
اسلام
شكرااااا لمرورك و تعليقك
قلي ايه اللي مش فاهمة و انا اقولهولك
:)
جانا
نورتي يا قمرة جداااا
:)))
http://antihack-protect.blogspot.com/
http://antihack-protect.blogspot.com/
الدنيا زي الغازية , ترقص لكل واحد شوية
منطقي اوي المثل ده
thx
كشف تسربات المياة
غسيل خزانات
شركة نظافة عامة
Post a Comment